АКАФИСТ СВЯТОМУ ПРАВЕДНОМУ ДАНИИЛУ АЧИНСКОМУ

Кондак 1

Избранный Господом угодниче земли Сибнрския, служение Царю Небесному паче мирския славы возлюбивый, и всеконечною любовнию души Тому последовавый, дивный молитвенниче и преславный чудотворче, благое иго Христово на ся вземый и усердно понесый, поминай нас, чтущих память твою и приносящих тебе похвальная пения сия: Радуйся, праведный Данииле, Сибирския земли покровителю.

Икос 1

Ангельскому житию подражатель бывый, яко един от древних подвижник явился еси, всем сердцем твоим Владыце Христу послужити вожде-лев. Темже, воинство земное оставль, в дальнюю страну Сибирскую пришел еси, аще и неволею; обаче сие бысть Господне промышление о тебе, да будеши светильник, горяй и светяй в земли северней. Темже любовию зовем ти:

Радуйся, праведниче, мирския суеты отвративыйся.

Радуйся, ничесоже паче Бога возлюбивый.

Радуйся, тесный путь Христов избравый.

Радуйся, скорбьми и страданьми Господу последовавый.

Радуйся, в узах и лишениих дух радостен имевый.

Радуйся, на волю Божию положивыйся.

Радуйся, воине добропобедный.

Радуйся, в терпении твоем увенчанный.

Радуйся, образе кротости.

Радуйся, правило веры несумненныя.

Радуйся, обиды и уничижения со смирением приемый.

Радуйся, и нам, одержимым гордостию, скорый исцелителю.

Радуйся, праведный Данииле, Сибирския земли покровителю.

Кондак 2

Видяще людие, суетою омраченнии, твое ко Господу устремление, первее многажды тебе, праведниче, досаждаша, яко и в зиме и в наготе студеною водою тя обливаша; ты же, блаженне, Севастийстей четыредесятице воинов Христовых подобяся, за обидящих тя кротце молился еси, поя Господеви: Аллилуйя.

Икос 2

Разум Христов явил еси, святе Данииле, в светлем житии твоем: на Господа бо всю надежду твою возлагая, не посрамлен явился еси от упования своего, егда мучителем твоим, скорбию и болезнию внезапу пораженным, с покаянием к тебе припадати и горькия работы тя свободити. Мы же, чудящися таковей велией вере твоей, вопием ти:

Радуйся, пророку Даниилу, от рва львинаго изшедшу, уподобивыйся.

Радуйся, отроком трием в пеши поющим подражавый.

Радуйся, яко злато во огни искушенный.

Радуйся, любовию небесною разжженный.

Радуйся, унынию противоборче крепкий.

Радуйся, тя чтущим сладкий утешителю.

Радуйся, обидимым помощниче.

Радуйся, нас, маловерных, дивно ободряяй.

Радуйся, всепрощения учителю.

Радуйся, Евангельских учений исполнителю.

Радуйся, в скрижалех сердца закон Божий впечатлен имеяй.

Радуйся, живый в помощи Вышняго.

Радуйся, праведный Данииле, Сибирския земли покровителю.

Кондак 3

    Сила Вышняго осени тя, святый подвижниче, и на вящие подвиги вождаше тя; жестоко житие избрал еси, в зело тесней и малей келлии, гробу подобней, затворися, труды ко трудом прилагал еси, выну очи сердечнии ко Творцу всяческих возводя и зовый Ему: Аллилуйя.

Икос 3

Имущи горе ко Престолу Славы сердце твое, весь озарения Духа Святаго исполнен был еси, николиже свещи и лампады в келлии своей возжигати восхотев; Свет бо Христов, просвещаяй всех, умныма очима твоима зря, огня вещественнаго не требовал еси. Просвети убо и нас, Господень угодниче, поющих ти сице:

Радуйся, града Ачинска украшение.

Радуйся, всея Сибири похвало.

Радуйся, в нощи греховней заблуждающим наставниче.

Радуйся, яко просветися свет твой пред человеки.

Радуйся, яко в тебе прославися Отец Небесный, дивный во святых Своих.

Радуйся, затворниче и прозорливче.

Радуйся, даров Божиих исполненный.

Радуйся, подвигом добрым подвизавыйся.

Радуйся, текий к Богу, яко елень на источники водныя,

Радуйся, яко благослови тя Господь от Сиона.

Радуйся, не давый сна очима твоима и веждома дремания.

Радуйся, яко Господь просвещение твое.

Радуйся, праведный Данииле, Сибирския земли покровителю.

Кондак 4

Бурю страстей воздвизающее сребролюбие совершенно отвергл еси, Данииле, и в тихое пристанище безстрастия достигл еси, ничесоже от имений земных стяжавая, руце твои в труды вдал еси, да хлебом насущным ся пропитаеши. Истинно сокровище твое на Небеси бысть в Бозе сокровенно, Емуже поем: Аллилуйя.

Икос 4

Слышавше окрест тебе живущий, яко многоценен сосуд благодати Божия близ их обретеся, возрадовашася зело, и мнози текоша к тебе, глаголаша бо: токмо зрети святаго старца сего уже велико есть. Слово твое бысть любовию растворено, многия ко спасению наставил еси, вопиющия ти:

Радуйся, старче милостивый и кроткий.

Радуйся, болящих исцелителю.

Радуйся, в посте выну пребываяй.

Радуйся, молитву николиже оставивый.

Радуйся, присно лице светло и радостно имевый.

Радуйся, яко возвеселися дух твой о Бозе, Спасе твоем.

Радуйся, нарушителей святых постов обличителю.

Радуйся, яко многи от словес твоих на покаяние обратишася.

Радуйся, яко словеса твоя бысть сотове медовнии.

Радуйся, яко и от жидовства некия ко православию привел еси.

Радуйся, яко талант, от Бога данный ти, не скрыл еси.

Радуйся, яко тем ближним послужил еси.

Радуйся, праведный Данииле, Сибирския земли покровителю.

Кондак 5

Боготечное шествие совершал еси, правед-ниче, велия подвиги поста, молитвы и бдения совершая, еще же и нощию ко убогим и немощным приходя, в вертоградех и селех их трудился еси, никимже видим. Мы же, чада твоя сущии, делом твоим отнюд подражати не можем, леностию обдержимии, но молися ныне о нас, святче Божий, да сподобимся с тобою звати: Аллилуйя.

Икос 5

Видяще благое и доброе течение твое, враг рода человеческаго воздвиже на тя зависть в сердце брата некоего, паче же лжебрата, и той взем нож, идяше, да умертвити тя. Ты же, старче святе, тихими глаголы твоими бесовскую злобу разорил еси, ко слезам раскаяния брата приводяше. Темже приими от нас похвалы сия:

Радуйся, смирением диаволю гордыню сокрушивый.

Радуйся, яко Бог хранит Своих угодников.

Радуйся, милосердия сияние.

Радуйся, кротости благоухание.

Радуйся, Духа Святаго приятелище.

Радуйся, миротворче блаженне.

Радуйся, разрушаяй греховныя начинания.

Радуйся, в добрых делех скорый помошниче.

Радуйся, в невидимей брани духа злобы победителю.

Радуйся, вземый во оружие Имя Иисусово сладчайшее.

Радуйся, святое Имя сие зело возлюбивый.

Радуйся, прославивый Господне заступление.

Радуйся, праведный Данииле, Сибирския земли покровителю.

Кондак 6

Проповедь дивная явися житие твое, да последуем стопам твоим, в пути бо Божия ходил еси, о Данииле: яко велик сый пред Господем, смирился еси паче всех человек, николиже пред собою вострубив. Темже и хотящим зрети подвиги твоя не попускал еси, и вопрошающим умолчал еси, да будет похвала твоя не в людех, но от Бога, Ему же вопием выну: Аллилуйя.

Икос 6

Возсиял еси, яко светильник на свещнице, аще и живый во гроб сошел еси, но утаитися не возмогл еси, весть бо Господь прославляти святыя Своя. Даром бо исцеления и прозрения тя обогатив, дивна помощника тя сотворил есть людем Своим, да благодарно зовем ти:

Радуйся, многажды грядущая прозреваяй.

Радуйся, от нечаемых зол избавителю. Радуйся, смиренне старче, от архиереев почитаемый.

Радуйся, богатство разсуждения имеяй.

Радуйся, славу земную нивочтоже вмени вый.

Радуйся, во славе Небесней ныне вселивыйся.

Радуйся, жене скорбящей болезнь очес исцеливый.

Радуйся, прошений наших николиже отринувый.

Радуйся, яко в тебе радость обретаем.

Радуйся, велий о нас молитвенниче.

Радуйся, теплая наша надеждо.

Радуйся, веселое наше упование.

Радуйся, праведный Данииле, Сибирския земли покровителю.

Кондак 7

Хотящу ти, святе Данииле, неключимым пред людьми явитися, да не прославляют тя, от много лет носимыя вериги напоследок снем, * оставил еси, глаголя: не имам более пользы от сих, яко обыче плоть и болезни не приемлет; вящшую же пользу обрящу души моей, егда рекут вси, яко разленился есть ныне Даниил. Мы же Богу, даровавшу ти таковое истинное смирение, вопием: Аллилуйя.

Икос 7

Новый подражатель святоотеческому житию явился еси, блаженне, царским путем рассуждения шествуя, еже по глаголу великаго Антония вышши есть всех добродетелей: мнози бо постницы и пустынницы, дара сего не имущии, жалостне погибоша. О угодниче Христов! Молися за ны, да дарует Господь дух разума безумию нашему, яко да воспоем ти сицевая:

Радуйся, древним отцем истинный последователю.

Радуйся, твердый хранителю отеческих преданий.

Радуйся, духом их исполненный.

Радуйся, неложную святость явивый.

Радуйся, во многих подвизех не возгорди-выйся.

Радуйся, иноком путеводителю.

Радуйся, целомудрием водимый.

Радуйся, нестяжанием к Богу возлетевый.

Радуйся, память смертную стяжавый.

Радуйся, простотою своею всем любезный.

Радуйся, мирския разговоры не терпяй.

Радуйся, уединению всем сердцем прилепивыйся.

Радуйся, праведный Данииле, Сибирския земли покровителю.

Кондак 8

Странное чудо видим о тебе, Данииле, яко старец сый немощный, лютою болезнию ног стражда, не восхотел еси ослабити подвиги твоя, якоже и преподобный столпник Симеон. Темже мученическую благодать прием, возшел еси ко Господу твоему яко на колеснице огненней, в нюже впрягл еси терпение твое, зовый: Аллилуйя.

Икос 8

Весь бе к Вышним устремлен, в затворе теснем свободу духа обрел еси, яко орел небесный ко Престолу Пресвятыя Троицы духом возлетаяй, всякое бо житейское попечение отложил еси. Мы же, убозии и оскверненнии, кое ти достойное похваление принесем, присно в земных мятежах сущий и о горнем не помышляющий; обаче любовию величаем тя:

Радуйся, Данииле, Божий тайнозрителю.

Радуйся, со бесплотными приносяй хваление.

Радуйся, и сам, яко бесплотен, пребываяй.

Радуйся, нам, немощным, ходатаю пред Богом.

Радуйся, яко отверзошася тебе врата Небесная.

Радуйся, яко вшел еси, идеже несть болезнь, печать и воздыхание.

Радуйся, за многи поты и труды мздовозда-яние приемый.

Радуйся, Богу возлюбленне.

Радуйся, в Сибири хладней цвете рая прекрасный.

Радуйся, святости молния лучезарная.

Радуйся, яко тебе ради Господь землю нашу благослови.

Радуйся, яко твоя молитва грешныя спасает.

Радуйся, праведный Данииле, Сибирския земли покровителю.

Кондак 9

Всякое естество Ангельское удивися благоволению Божию о святых Своих, яко далече друг от друга сущий и николиже видевшияся, духом присно, яко лицем к лицу, сообщаются. Преподобный бо Серафим духовным братом тя, Данииле, именоваше, и словес твоих истину являше, да вси поют Богови: Аллилуйя.

Икос 9

Ветия многовешанныя спешат по достоянию славити святых угодников, но не возмога-ют. Како бо воспоем благодать в тебе, праведниче, сущую, еюже многия ко иноческому Ангельскому житию наставил еси, во святыя обители стопы ищущих спасения направляяй, поющих похвальная пения таковая;

Радуйся, многи души приведый к Жениху Христу.

Радуйся, вопрошающим благий советник.

Радуйся, добрый кормчий.

Радуйся, любителю благочестия.

Радуйся, древо Богонасажденное.

Радуйся, плоды добрыя возрастивый.

Радуйся, класе благорасленный.

Радуйся, ниво, воздающая сторицею.

Радуйся, луче Божественнаго света.

Радуйся, многоценный бисере Христов.

Радуйся, сладкий хлебе Господеви твоему.

Радуйся, праведный Данииле, Сибирския земли покровителю,

Кондак 10

Спасти хотя чада твоя духовныя, теплою любовию тя почитающия, на конец жития земнаго во святую обитель енисейскую пришел еси, старче; игумении бо тоя, еще мирстей жене сущей, обещался еси, яко егда будеши на твердей земли монашескаго жительства, прииду к тебе, ты же мя и погребеши. Слово твое делом исполнил еси, да радуяся вси поют: Аллилуйя.

Икос 10

Стена есть крепкая в напастех молитва твоя, праведне Данииле, обители святой, юже возлюбил еси, избрати ю местом упокоения своего. Дивныя в сем дела Божия явишася: яко Ачинским тебе глаголему быти, енисейстии люди тя своим чтут, благодаряще Бога, тебе же, святе, выну вопиюще:

Радуйся, душу твою светле уготовавый.

Радуйся, с радостию кончину ожидавый.

Радуйся, причастия Святых Тайн сподоби-выйся.

Радуйся, тихо дух свой в руце Божий предавыи.

Радуйся, яко во гробе лик твой чудно просветися.

Радуйся, яко к погребению твоему весь град стечеся.

Радуйся, яко Господь тя, странника, прослави.

Радуйся, яко сице прославляет Бог вся, верно Его славящия.

Радуйся, яко Енисейск тобою хвалится.

Радуйся, яко Благую Вратарницу о нас молиши.

Радуйся, во обитель Христову пришедый.

Радуйся, мощи своя обители, яко бесценен дар, оставивши.

Радуйся, праведный Данииле, Сибирския земли покровителю.

Кондак 11

Пение людие приношаху тебе в честнем погребении твоем, обаче внуцы погребавших тя, оставиша Бога и святых Его, Божия же храмы и обители возненавидеша. Велия скорбь бысть и лютое безумие, егда мощи твоя святыя из земли поднявше, на поругание предаша; кто бо над отцами своими ругается, точию Хама древняго подражателие, не ведущии пети: Аллилуйя.

Икос 11

Светоприемная свеща бысть нам память твоя, дивне старче наш, в житии твоем многия скорби от злых человек приемый, но и по кончине от духов злобы в мощех твоих пострадавый. Тако нас поучаеши, яко вся Господа ради претерпети должни есмы. Мы же любовию зовем ти:

 Радуйся, к преподобным причтенный.

Радуйся, за Христа мощами пострадавый. Радуйся, о покаянии безбожников молящийся.

Радуйся, о погублении храмов скорбящий.

Радуйся, безумцев вразумителю.

Радуйся, веры насадителю.

Радуйся, гонимым укрепителю.

Радуйся, народа твоего не отвративыйся.

Радуйся, святе, никакоже нас оставивый.

Радуйся, присно чтущим тя спребываяй.

Радуйся, гладным питателю.

Радуйся, сирых попечителю.

Радуйся, праведный Данииле, Сибирския земли покровителю.

Кондак 12

Благодать дати восхотев, Господь яви нам угодника Своего Даниила, в лице святых Сибирских, яко звезда незаходимая сияющаго, да его молитв ради приимем вся, яже ко спасению полезная прошения, и возопиим Богови, благодеющему нам: Аллилуйя.

Икос 12

Поюще тя, святый старче Данииле, и пред очесы приводяще множество болезней и трудов твоих, Господа ради подъятых, умиляемся сердцем и душею, велиим гласом славя Создателя нашего, иже естеству человечу даде благодать таковую, яко немощен человек возможе тако возлюбити Тя, Господи. Да приидет и на ны, старче блаженне, молитвами твоими дар сей, внегда пети сице:

Радуйся, Ангелом купножителю;

Радуйся, нам, грешным, скорый послуша-телю.

Радуйся, лику преподобных сочетанный.

Радуйся, зерцало праведного жития.

Радуйся, безсребренником брате.

Радуйся, блаженным сообитателю.

Радуйся, яко поношаем был еси правды ради.

Радуйся, яко мзда твоя многа на Небесех.

Радуйся, взалкавый и мозжадавый правды Божия.

Радуйся, яко ея ныне насыщаешися.

Радуйся, обретый Желаемаго.

Радуйся, ожидаяй нас в Царствии Небеснем.

Радуйся, праведный Данииле, Сибирския земли покровителю.

Кондак 13

О всечудне праведниче, Данииле блаженне! Услыши ны, чада твоя, многою любовию тя славящия, и приклонися благоутробно гласу молений наших; простри нам помощь твою и крепкое заступление в житии сем, и в час кончины нашея буди о нас ходатай непостыден, да сподобимся с тобою в дивных селениях Небесных славити и воспевати Творца нашего во веки веков: Аллилуйя.

Этот кондак читается трижды.

Икос 1

Ангельскому житию подражатель бывый, яко един от древних подвижник явился еси, всем сердцем твоим Владыце Христу послужити возжелав. Темже, воинство земное оставль, в дальнюю страну Сибирскую пришел еси, аще и неволею; обаче сие бысть Господне промышле-ние о тебе, да будеши светильник, горяй и светяй в земли северней. Темже любовию зовем ти:

Радуйся, праведниче, мирския суеты отвративыйся.

Радуйся, ничесоже паче Бога возлюбивый.

Радуйся, тесный путь Христов избравый.

Радуйся, скорбьми и страданиями Господу последовавый.

Радуйся, в узах и лишениих дух радостен имевый.

Радуйся, на волю Божию положивыйся.

Радуйся, воине добропобедный.

Радуйся, в терпении твоем увенчанный.

Радуйся, образе кротости.

Радуйся, правило веры несумненныя.

Радуйся, обиды и уничижения со смирением приемляй.

Радуйся, и нам, одержимым гордостию, скорый исцелителю.

Радуйся, праведный Данииле, Сибирский земли покровителю.

Кондак 1

Избранный Господом угодниче земли Сибнрския, служение Царю Небесному паче мирския славы возлюбивый, и всеконечною любовнию души Тому последовавый, дивный молитвенниче и преславный чудотворче, благое иго Христово на ся вземый и усердно понесый, поминай нас, чтущих память твою и приносящих тебе похвальная пения сия: Радуйся, праведный Данииле, Сибирския земли покровителю.

Молитва святому праведному старцу Даниилу

О, великий угодниче Божий, праведный старче Данииле! Многое дерзновение у Господа стяжал еси, яко Того ради толикия труды и подвиги понесл еси, яко невозможно есть нам исчислити я. Темже много может молитва твоя, и ходатайству твоему дадеся от Господа благодать велия. Помяни убо ны у Престола Божия, святе старче наш! Писано бо есть, яко чада праведнаго во благоволении будут, и род правых благословится. Мы же чада твоя есмы, аще и по стези отца нашего не ходим, выну благаго Создателя нашего прогневляюще. Но молися за ны ко Господу, да обрящем милость во оставлении грехов наших, во исцелении страстей и немощей наших. Да приидем от богопротивныя злобы в любовь и смирение, да возможем понести крест свой в терпении и кротости, благодаряще Бога о всем. О праведниче Божий! Не остави нас без твоего заступления, не отврати от нас помощи твоея, виждь немощь нашу и умилосердися на ны. Виждь наши скорби и болезни, к кому бо прибегнем во унынии и малодушии своем, аще не к тебе, милостивый наш покровителю? Умоли о нас Создателя нашего, Емуже ты славне послужил еси в житии сем. Яко да твоими молитвами спасаеми, сподобимся непреткновенно внити в Царствие Небесное, и воспевати вкупе с тобою Бога нашего, в Троице Святей славимаго, Отца, Сына и Святаго Духа, ныне и присно, и во веки веков. Аминь.

Господу нашему слава!